تلخیص: محمد رزاقی
«سالورقازان» گونلرین بیرگونو دئدی: بگ‌لر ییغیشین اووا گئدک. اوروز قوجا دئدی: آغام قازان ائوینی باش سیز قویوب اووا گئتمک ایسته‌ییر. قازان دئدی: اوغلوم «اوروز» اوچ یوز ایگیت‌له ائویمین اوستونده دورار. اوغوز بگ‌لری آتلارینی مینیب یولا دوشدولر. بو اولایی(حادثه‌نی) شوکلی ملیکه خبر وئردیلر. یئددی مین قوشونلا قازان بگین اوردوسونا گلدی. قازانین یوردونو تالان قویدولار. قازانین آروادی بورلاخاتون ایله قیرخ اینجه قیزلاری اسیر توتدولار. اوروزو دا الی- قولو باغلی قاباقلارینا قاتیب دؤیه- دؤیه آپاردیلار. ساری قولماش شهید اولدو. قازانین قوجا آناسینی قارا دوه بوینوندا آسیلی آپاردیلار.
نوشته‌های مرتبط
شوکلی ملیک اؤز آداملارینا اوز توتوب دئدی: بیز ایسته دیگیمیزی ائله‌دیک. آتلار، خزانه، قیرخ اینجه قیزلار. قازانین آروادی … داهی نه قالدی ائتمه‌لی اولاق!
آداملاردان بیری دئدی: قازانین، قاپیلار دربندینده اون‌مین قویونو وار. اونلاری دا اله گئچیرسک یاخشی اولار. شوکلی ملیک دئدی: یوز آتلی گئتسین او قویونلاری گتیرسین.
قاراجوق(قره‌جق) چوبان بیر قورخولو یوخو گؤروب. آینیدی. قارداش‌لاری قابان گوج ایله دمیرگوجو یانینا چاغیریب قویونلارین تؤیله‌سینی دوزگون برکیتدی. اوچ یئرده ده تپه کیمی، داش توپلادی. اوزون قوللو ساپاندینی دا آلدی الینه.
آلتی یوز کافر قاراجوق چوبانا سالدیردیلار. آت چاپدیلار، اوخ آتدیلار قاراجوق چوبان دا اونلارا قارشی گلدی. دوشمن باشچی‌سی ایسته‌دی چوبانی یاغلی دیل ایله آلداتسین. آنجاق چوبان ساپاندی آتارکن بیرداشا ایکی، اوچ آدام ییخیردی. دوشمه‌نین یاریسی ساپاندداشی ایله یئره سریلدی.
قاراجوق چوبانین قارداش‌لاری بو ساواشدا شهید اولدولار. چوبانین داشی قورتاردی. قویون، گئچی‌نی داش یئرینه ساپاندا قویوب کافرلره آتدی. یاغی‌لار قورخوب قاچدیلار.
چوبان شهید قارداشلارینی قویلادی.
قازان‌خان گئجه یاتیر. بیر یوخو گؤرور. یوردونون اوستونو قارا بولوتلار آلیب، یوردو قارایله یاغمور آلتیندا قالیب، قارا ساچلاری اوزانیب. اون بارماغی قان ایچینده، یوخودان دوروب. قارداش قارا گونه‌نی چاغیریب اوندان یوخوسونون یورومونو ایسته ییر. قاراگونه یوخونون هامی‌سینی یورا بیلمیر.
قازان آتینی مینیب ائل اوباسینا گلدی. گؤردو یوردوندا قوزغون دولاشیر.
قازان یولا چیخیر. گلیب سودان اؤز ائلینی سوروشور، سو، نه خبر وئره جک.
یئنه گلیر بیر قوردا توش اولور. قورددان دا بیر خبر قازانا وئریلمیر. قاراجوق چوبانین قارا کؤپه‌گی، قازانا قارشی گلیر، قازانی بیرباش چوبانین یانینا آپاریر. چوبان گؤردوک‌لرینی، ساواشلارینی بیر-بیر قازانا آنلادیر. قازان قهره گلیب، آتینی چاپیر، چوبان دا اونون آردیندان گئدیر.
بو یاندان شوکلی ملیک آداملاری ایله یئییب، ایچیب کئف ائدیردی. آداملارینا دئدی: بویو اوزون بورلاخاتونو گتیرین بوردا باده گزدیرسین. بورلاخاتون بونو بیله‌رک قیرخ اینجه قیزلارا تاپشیردی. سوروشسالار قازانین آروادی کیمدی؟ هره بیریاندان های وئرسین.
بئله‌لیک‌له شوکلی ملیک‌ین آداملاری بورلا خاتونون کیم اولدوغونو بیلمه‌دیلر. شوکلی ملیکه بو ایشی دئدیلر. بویروق وئردی: اوروزو آسین، آغ اتیندن قارا قوورما بیشیرین، قیرخ قیزلارا وئرین، یئمه‌ین آدامی آلیب گتیرین باده گزدیرسین.
ائله بو آنلاردا سالورقازان، قاراجوق چوبان اؤزلرینی یئتیردیلر. قازان دئدی: ایه! شوکلی ملیک نه گتیرمیسن یوردومدان سنین اولسون یالنیز آنامی قایتار منه، ساواشسیز گئری دؤنوم.
شوکلی ملیک دئدی: گتیردیک‌لریمیزی گئری وئرمه‌ریک. سنین آنانی دا یایخان کئشیشین اوغلونا وئره‌جه‌ییک.
بو آرادا اوغوز قهرمانلاری اؤزلرینی یئتیردیلر. هامیدان قاباق قازانین قارداشی قارا گونه ایدی، یئتیش جک؛ «چال قیلینجینی قارداش، قازان یئتدیم! » دئدی.
آردیندان دلی دوندار، قارا بوداق، شیرشمس الدین، بئیرک، یئگنک، اوروز قوجا، بوگدوزامن، آلپ ارن؛ اوغوز بگ‌لری سایماقلا قورتارماز.
قیامت بیر ساواش اولدو. میدان دولو باش اولدو.
دیش اوغوز بگ‌لری ایله دلی دوندار ساغدان، قارا گونه اوغلو دلی بوداق سول الدن، ایچ اوغوز بگ‌لری ایله قازان اورتادان یوروش ائتدیلر.
شوکلی ملیک، قازانا قارشی گلیب، باشی کسیلدی، ساغ یاندا قارا تئکور، دلی دوندار الینده اؤلدو. سول یاندا بوغاجیق ملیکه دلی بوداغین آلتی پرلی گؤرزو ایله وورولورکن دونیا گؤزونه قارانلیق اولدو. اون ایکی‌مین کافر قیلینجدان کئچدی. بئش یوز اوغوز ایگیدی شهید اولدو. قازان تالانمیش وارینی گؤتوروب یوردونا قاییتدی. قاراجوق چوبانی امیرآخور ائله دی.
یئددی گون یئددی گئجه شنلیک اولدو، یئدیلر، ایچدیلر. قازان بگ، قیرخ نفر نؤکر، قیرخ نفر ده کنیز اوغلو اوروزون باشینا دولاندیریب آزاد ائتدی. اردملی ایگیت‌لره چوخ یئر، مال، دؤولت وئردی.
ددم قورقود گلیب بوی بویلادی، سؤی سؤیله دی بو اوغوز نامه‌نی دوزدو.
axarsu.bulanmaz@gmail.com
http://anthropology.ir/node/23671
از همین نویسنده پیش از این در انسان شناسی و فرهنگ منتشر شده است
http://anthropology.ir/node/14952
http://anthropology.ir/node/23802
http://anthropology.ir/node/23935
http://anthropology.ir/node/18508
http://anthropology.ir/node/19899
http://anthropology.ir/node/24041
http://anthropology.ir/node/24183
