تلخیص محمد رزاقی
اون ایکینجی بوی- ایچ اوغوزا تاش اوغوز عاصی اولوب بیرک اؤلدوگو
نوشته‌های مرتبط
سون بؤلوم
باییندیر خان دونیادان گئتمیشدی. اوغوز ائللری‌نین باشیندا سالور قازان دوروردو. سالور قازانین بیر گله‌نه‌گی وار‌ایدی. ایچ اوغوز ایله دیش اوغوز بیر یئره ییغیشاندا قازان ائوینی ییغمالاندیراردی.
ییغمالاما چاغی بیرجه حلالی‌نین الیندن توتوب چادیردان ائیشیگه چیخاردی. قالان نه وارسا جاماعات گؤتوروب اؤز آرالاریندا پایلاشاردیلار.
ییغمالاردا دیش اوغوز اولمادی. دیش اوغوزلاردان اولان اوروز ایله امن بونو بیلیب، قازاندان کوسدولر.
قازان قیلباش آدلی ایگیتدن سوروشدو:«دیش اوغوز بگلری چوخداندیر یانیمیزا گلمیرلر، اونلارا نه اولوب؟» قیلباش دئدی: قازان ائوینی ییغمالاندیراندا دیش اوغوزو چاغیرمادی. ایسترسینیز من گئدیب اونلارین دوست دوشمان اولدوقلارینی بیلیم.
قیلباش گلیب اوروزون یانینا، اونلارلا دانیشدی. اوروز دئدی:«گئت بیزیم قازانا دوشمان اولدوغوموزو سؤیله.» قیلباش آتلانیب گئری دؤندو.
اوروز قوجا، دیش اوغوز بگلرینی بیر یئره توپلاییب، قیلباشا دئدیگی سؤزو اونلارلا بیر آرایا قویدو. بگ‌لر هامیسی قازانا دوشمان اولوب آند ایچدیلر.
اوروز قوجا دئدی:«بئیرک بیزدن قیز آلیب اونو دا چاغیراریق، بیزیمله اولسا یاخشی اولار، اولمازسا اونو اؤلدوره‌ریک.
آدام یوللادیلار، بئیرک گلدی. قازاندان اوز دؤندردیکلرینی بئیره‌گه سؤیله‌دیلر. اونون دا دؤنمه‌سینی ایسته‌دیلر. بئیرک اونلارا قارشی دوردو. اوروز قوجا بئیره‌گین ساققالیندان توتوب، بئیره‌گین ساغ اومباسیندان بیر قیلینج چالدی.
بئیره‌گین یولداشلاری اونو اؤلومجول دورومدا گؤتوروب گتیردیلر. بئیرک یانیندا اولانلارین بیرینه دئدی:«اؤزون تئز قازان خانین یانینا یئتیر. باشیمیزدان کئچه نی اونا سؤیله.»
بو سؤزلری دئییب گؤزلرینی یومدو. بئیره‌گین آغ بوز آتی‌نین قویریوغونو کسدیلر. قارا گئیدیلر. قازانین یانینا گلیب، بئیره‌گین سؤزلرینی سالور قازانا چاتدیردیلار.
سالور قازان بو خبری ائشیتجک، دوروب اؤز اوتاغینا گئتدی. یئددی گون دیوانا چیخمادی.
قیلباش ایله قاراگونه قازانین یانینا گلیب، دئدیلر:«قازان ساغ اولسون! آغلامادان بیر شئی اولماز. بئیره‌گین اؤجون آلمالیییق.» قازان بوتون اوغوز قهرامانلارینی توپلادی.
بوز اوخ ایله اوچ اوخ (ایچ – دیش) قاریشدیلار. ایلک، قازانلا اوروز ساواشا گیردیلر. قازان، قوجا اوروزو ووروب آتدان سالدی. قاراگونه ده اونون باشینی کسدی. دیش اوغوز بگلری بونو گؤروب قازانین آیاغینا دوشدولر. قازان اونلاری باغیشلادی.
قازان چادیرلاری یئنیدن قوردو. مین شنلیک مجلیسی دوزلتدی. دده قورقود گلدی قوپوز چالدی، اوغوزنامه‌نی دوزدو.
