ورود

وارد شدن به حساب کاربری

نام کاربری*
رمز عبور *
من را بخاطر بسپار

ساختن حساب کاربری

پر کردن تمامی گزینه های دارای * اجباری می باشد
نام
نام کاربری*
رمز عبور *
تایید رمز عبور*
ایمیل*
تایید ایمیل*
کد امنیتی*
Reload Captcha

انسان شناسی و فرهنگ

انسان شناسی و فرهنگ
اندازه فونت: +

آذربايجان فولکلوروندا آرازلا ايلگيلي باياتيلار

اؤزت
يازيميزدا آذربايجان فولکلوروندا باياتيلاري گؤزدن کئچيرديک. دؤرت قايناقدا 8 ميندن آشيري باياتي تثبيت اولونوبدور. بونلارين ايچيده 68 باياتي آراز چاييلا ايلگيليدير. بو باياتيلار اورتاسيندا باغيمسيز باياتي، اورتاق و ميصراعلاري دئگيشيلن باياتيلار دا گؤرونور.
آچار سؤز‌لر: آزربايجان، فولکلور، باياتي، آراز.

گيريش
بو يازيدا آذربايجان فولکلوروندا آرازلا ايلگيلي باياتيلار اوزرينده دوراجاغيق. بو باياتيلاري دؤرت قايناق کيتابدان درله‌ييب، بير يئره توپلاديق.
ايلک قايناق م.ا.فرزانه 2010.جو ايلده يئدينجي باسيما چاتان «آذربايجان خالق ادبياتيندان باياتيلار» دير. بو کيتابدا 2500 دنه باياتي توپلانيبدير. بونلارين ايچينده 15 باياتي آرازا گؤره يازيلميشدير.
ايکينجي قايناق1979 ايلده م. نيقابي طرفيندن ياييملانان «آذربايجان باياتيلاري» دير. بو کيتابين بيرينجي بؤلومونده 930 باياتي قئيد اولونوبدور. 12 باياتي بو باياتيلار ايچينده آراز چايينا حصر اولونوبدور.
اوچونجو قايناق آذربايجان رئسپوبليکاسيندا 2010-جو ايلده ياييملانان «آذربايجان باياتيلاري» دير. بو باياتيلار بهلول عبداله، قيزيل گون بابازاده و ائلخان محمدلي ايش بيرليگي ايله درله‌نيب باسيلميشدير. بو کيتاب ايرانين اورمو ايلينده بهرام اسدي چاليشماسي ايله عرب آلفابئسينده ياييملانير. بو کيتابدا ياخلاشيق 4000 باياتي يئر آليب. بو باياتيلاردان 39 باياتي آراز قونوسونو ايچه‌رير.
دؤردونجو قايناق زنگان ايلينده باسيلان «زنگان باياتيلاري» دير. بو کيتاب حئيدر حسنلو طرفيندن 2010-جو ايل زنگاندا ياييملانير. بو کيتاب زنگاندا دئييلن 1000 باياتي ايله سوسله‌نيب. بو مين باياتيدان 2 باياتي آرازلا ايلگيلي يازيلميشدير.
بيز بو کيتابلارين ايچينده 8 ميندن چوخ باياتيني گؤزدن کئچيرديک. 68 باياتي سئچه بيلديک. بو باياتيلاري ايکي بؤلومه آييريريق:
آ) باغيمسيز باياتيلار: 23 دنه
ب) اورتاق و ميصراعلاري دگيشيلن باياتيلار: 45 دنه
اؤنجه باياتي و آراز چايينين قيسا تانيتيميني وئريب سونرا سئچيلن باياتيلار اوزرينده دوراجاغيق.

I. باياتي (ماني، هوريات)
باياتي تورک خالق ادبياتي‌نين ان چوخ قوللانيلان و ان کوچوک نظيم تورودور. يئدي هئجه‌لي دؤرت ميصراعدان مئيدانا گلير. 1، 2 و 4-جو ميصراعلار کندي آرالاريندا قافييه‌لي 3-جو ميصراع سربستدير.
تورکييه‌ده «ماني» گونئي دوغو و قوزئي ايراقدا «هوريات» ،قافقاسيا، آذربايجان و ايراندا «باياتي» دئييلمکده‌دير.
هر خوصوص باياتينين قونوسو اولا بيلر. باياتي سؤزونون تورک بويلاريندان بيريسي اولان و واختييلا دده قورقود گلنه‌گيني ان گوجلو شکيلده داوام ائتديرن «بايات بويو» نون آديندان گلديگيني علم آداملاري ايتفاقلا قبول ائتميشلردير. (قافقاسيالي :2007)
14. يوز ايلده رشيدالدين‌ين يازديغي جامع التواريخده بايات سؤزجوگونون آنلامي «دئولتلي و نعمتلي» قئيد اولونوبدور.
بو آنلام 15. يوز ايلده يازيلان يازيجي اوغلونون «تاريخي آل سلجوق»وندا دا گؤرونور.
1660 ايلده يازيلان «شجره تراکيمه» ده ايسه بايات سؤزجوگونون آنلامي يالنيز«دئولتلي» اولاراق وئريلميشدير.
احمد ب. ائرجيلاسونا گؤره بايات «زنگين» آنلامينداکي «باي»دان گلمکده‌دير، چونکي «باي»ين آنامي ايله بايات اوچون وئريلن «دئولتلي و نعمتلي» آنلاملاري اويوشماقدادير. ( ائرجيلاسون :2008)
سيد علي مير سلامت باياتي حاقيندا بئله يازير: بايات کلمه‌سي، ايندي ده قالميش و اسکي، کؤهنه معناسيلا ايشله‌نير. بو کلمه فلسفه دونياسيندا «قدم» ،کلمه‌سيله «ايلکين يارانيش» معناسيني داشييير. (ميرسلامت :2003)
باياتي بير سؤز تئرميني کيمي هم «کؤهنه، بويات» کلمه‌سيله علاقه لنديريلميش، هم «اولو تانري» کيمي معنالانديريلميش، هم ده اوغوز خانين نوه‌سي، گون خانين ايکينجي اوغلو باياتين، سونرالار ايسه اسکي آذربايجانليلارين سوي کؤکونده اهميتلي رول اويناميش عيني آدي داشييان قبيل، طايفا، ائلين آدي ايله باغلانميشدير. (عباسلي: 2010)

II. آراز چايي
آراس نهري (ازربايجانجا آراز؛ ائرمنيجه:
արաքս؛ فارسجا: :ارس) تورکييه‌نين دوغو آنادولو بؤلگه‌سينده آراس نهري؛ بين‌گؤل داغلارينين ارزوروم ايل سينيرلاري ايچينده قالان قوزئي ياماچلاريندان دوغار.[تئکمان يايلاسينين بوتون سولاريني توپلايان آراس ايرماغي ساکال‌توتان داغلارينين دوغوسونداکي هاوزا(هؤوز) ايچريسينده قوزئي يؤنونده آخار. ساکالتوتان داغي ايله توپچو داغي آراسيندا قالان، درين و سارپ مسجيتلي بوغازيني گئچتيکدن سونرا پاسينلر اوواسينا انر. بورادا يوخاري پاسين هاوزاسينين سولاريني توپلاياراق گلن هاسان‌قالا (پاسينلئر) چاييني آلير و قوزئي‌دوغو يؤنونده آخاراق ايل سينيرلاري ديشينا چيخار. ارزوروم-قارس پلاتوسونون گونئيينده‌کي‌چؤکونتو آلانلاريندا آخاراق ارمنيستان سينيرينا اولاشير[تورکييه]] - آزربايجان، تورکييه - ارمنيستان و آذربايجان - ايران سينيرينين بير بؤلومونو اولوشتوردوقدان سونرا آذربايجاندا کورا(کور) نهرينه دؤکولن نهير. 1072 کیلومئتر اوزونلوغوندا، 102 مين ²cm هاوزا(هؤوز) آلانينا ساحیب نهير قافقاسيانين ان بؤيوک نهيرلريندن بيريدير. نهرين 548 کیلومئتریسي تورکييه سينيرلاري ايچريسينده‌دير.
11 کیلومئترليک آزربايجان-تورکييه کوريدوروندان سونرا ناهجيوان(ناخچيوان)-ايران سينيريني، ارمنيستان-ايران و تکرار آزربايجان-ايران سينيريني ايزله‌مکته‌دير.
نهره قوزئيدن (ساغدان) دؤکولن آنا قوللار شونلاردير: زنگمار، ساري‌سو، کوتور، حاجيلار، کئليبار، ايلگئنا، دارئ و بالها. تورکييه‌ده گارئسو نهري آراسا سولدان، ارمنيستانداکي آکورييان، مئتسامور، هرازدان، آزات، وئدي، آرپا، ووروتان، ووگجي آند مئگري ايسه ساغدان دؤکولمکته‌دير. هاچين، اوکچي، کوري و کاندلان نهيرلري آراسين آزربايجانداکي کوزئي کوللاريدير.
(http://tr.wikipedia.org/wiki/Aras_Nehri)

III. باغيمسيز باياتيلار


1- آرازين باشي هاراي
ديبينين داشي هاراي
آنامين آغ لاواشي
قوروتلو آشي هاراي (ف. ص. 245)

2- آرازين بير سسي يوخ
شادليقلار نغمه‌سي يوخ
گؤزلريندن ياش آخار
دئييلله غوصه سي يوخ (ه. ص. 77)

3- آرازيم آرام يئري
سيزيلدار يارام يئري
هر مئحنته دؤزرم
کسيليب چارام يئري (ن. ص.7)

4- آراز اولوب آخئيديم
ياخاما گول تاخئيديم
ايتگين آرزولاريمي
آختارئيديم تاپئيديم (ن. ص. 11)

5- آراز کيمي آخيرام
يانديريرام ياخيرام
گؤزلرينده گؤزوم وار
حسرتيله باخيرام (ن. ص. 14)

6- آرازا، گمي گلدي
من دئديم، هامي گلدي
سن آغلا، آي گؤزلريم
آيريليق د‌مي گلدي (ه. ب. م. ص. 23)

7- آرازدا آخار قالدي
ترلان اوچدو، سار قالدي
ائليمدن آيري دوشدوم
گؤزلريم باخار قالدي (ه. ب. م. ص. 25)

8- آراز گلدي، يان آخدي
ديبيندن مين جان آخدي
وطن ساري باخاندا
اوره‌گيمدن قان آخدي (ه. ب. م. ص. 25)

9- کئچمه، آراز دريندير
ايچمه سويو، سريندير
حسرت باخان بو ائللر
سنين ده ائللريندير (ه. ب. م. ص. 32)

10- آراز گلير داشينان
سويو قالخير باشينان
ازه‌لي دوم‌دورويدو
بولاندي گؤز ياشينان (ه. ب. م. ص. 96)

11- آراز داشدي دئديلر
کور قاريشدي دئديلر
ملحمي يارامادي
حکيم قاشدي دئديلر (ه. ب. م. ص. 116)

12- آراز باشدان ليل گلير
دسته دسته گول گلير
نئيليرم بئله ياري
آيدا، ايلده بير گلير (ه. ب. م. ص. 116)

13- آراز باشدان آزالدي
اوستون اؤردک قاز آلدي
اولان اولماز هوشومو
گئدن سروي ناز آلدي (ه. ب. م. ص. 181)

14- آراز گلير ليلله‌نير
سويو گلير گولله‌نير
ياري خلوتده گؤرجک
منيم قلبيم ديلله‌نير (ه. ب. م. ص. 229)

15- آراز آخير قول اوسته
خوش گونو وار سول اوسته
ايستيرم يئتم يارا
ياغي دوروب يول اوسته (ه. ب. م. ص. 248)

16- آراز آراز، خان آراز
داغلاردان آخان آراز
ياردان بير خبر گتير
ائويمي ييخان آراز (ه. ب. م. ص. 250)

17- آرازا گمی گلدي
سو داشدي، گمی گلدي
ياش تؤک، آغلا گؤزلريم
آيريليق ده‌مي گلدي (ه. ب. م. ص. 253)

18- آراز، بوردان آخ باري
ساللان باري، آخ باري
حسرت قالما، گؤزلريم
بير دويونجا باخ، باري (ه. ب. م. ص. 265)

19- آراز اوسته نانه‌يم
يئل اسير، پروانيم
ياريم گئديب تيفليسه
دلييم، ديوانه‌يم (ه. ب. م. ص. 273)

20- کور- آراز داشيب گللم
يولومو چاشيب گللم
هر ياني ياغي توتسا
داغلاري آشيب گللم (ه. ب. م. ص. 274)

21- آراز آخار آخيمنان
سويو دورماز آخيمنان
ياردان نئجه دويوم من
بيرجه کره باخيمنان (ه. ب. م. ص. 283)

22- آرازين گميسينه
سو ساليم زميسينه
هئچ ايگيدين بالاسي
قالماسين اميسينه (ه. ب. م. ص. 411)

23- آراز آخار ليلينن
بولبول اوينار گولينن
سني نئجه آغلاييم
بو قوروموش ديلينن (ه. ب. م. ص. 427)

IV. اورتاق و ميصراعلاري دئگيشيلن باياتيلار

1-1 آراز اشاندا آغلار
کور قوووشاندا آغلار
بالالار آناسيندان
آيري دوشنده آغلار (ف. ص. 65)

1-2 آراز داشاندا مه‌لر
کور قوووشاندا مه‌لر
بالا اؤز آناسيندان
آيري دوشنده مه‌لر (ه. ب. م. ص. 304)

1-3 آراز آشاندا مه‌لر
کور قوووشاندا مه‌لر
آناسيندان بالالار
آيري دوشنده مه‌لر (ه. ب. م. ص. 436)

2-1 آرازي آييرديلار
قومونان دويوردولار
من سندن آيريلمازديم
ظولمونن آييرديلار (ف. ص. 77)

2-2 آرازي آييرديلار
قومونان دويوردولار
من سندن آيريلمازديم
زور ايله آييرديلار (ه. ب. م. ص.136)

3-1 آراز آخار يان وئرر
سسي منه جان وئرر
يارامي ياخشي باغلا
پيس باغلاسان قان وئرر (ف. ص. 97)

3-2 آراز آخار، يان وئرر
سسي منه جان وئرر
يارامي مؤحکم باغلا
باغلاماسان قان وئرر (ه. ب. م. ص. 118)

3-3 آراز آخار، يان گئدر
اوستونده مين جان گئدر
يارامي يار باغلاسين
يوخسا، آخار قان گئدر (ه. ب. م. ص. 223)

4-1 آراز آراز، خان آراز
دريايا آخان آراز
سئوگيليم گميده‌دير
گل ائيله‌مه قان آراز! (ف. ص. 115)

4-2 آراز آراز قان آراز
سولطان آراز خان آراز
گؤز ياشينا باخان يوخ
قوي تؤکولسون قان آراز (ن. ص. 10)

5-1 آراز دگيلم جوشام
کور دگيلم قايناشام
آپار صراف يانينا
گؤر نئجه قيمتلي داشام (ف. ص. 154)

5-2 آراز دگيلم جوشام
کور دگيلم، قايناشام
آپار صراف يانينا
گؤر نئجه قئيمتلي داشام (ه. ب. م. ص. 195)

6-1 آراز کيمي بولاننام
باغچا کيمي سولاننام
اليم سنه چاتينجا
هر طرفي دولاننام (ف. ص. 157)

6-2 آراز کيمي بولاننام
باغچا کيمي سولاننام
اليم سنه چاتينجا
کت کت گزيب دولاننام (ه. ب. م. ص.194)

7-1 آرازام، کوره بندم
بولبولم، گوله بندم
من گئدرگي قوناغام
بير شيرين ديله بندم (ف. ص. 158)

7-2 آرازام نيله بندم
بولبولم گوله بندم
من گئدرگي قوناغام
بير شيرين ديله بندم (ن. ص. 11)

7-3 آرازام کوره بندم
بولبولم گوله بندم
دينديرمه قان آغلارام
بير شيرين ديله بندم (ه. ب. م. ص. 85)

7-4 آرازام، کوره بندم
بولبولم گوله بندم
من گئدرگي قوناغام
بير شيرين ديله بندم (ه. ب. م. ص. 196)

8-1 آرازين باشي منم
ديبينين داشي منم
هر ياندا قريب اولسا
اونون يولداشي منم (ف. ص. 166)

8-2 آرازين باشي منم
تورپاغي، داشي منم
غريبه آغلايانين
گؤزونون ياشي منم (ه. ب. م. ص. 423)

9-1 آراز اوسته بوز اوسته
کاباب يانار کؤز اوسته
قوي مني اؤلدورسونلر
بير آلا گؤز قيز اوسته (ف. ص. 225)

9-2 آراز اوسته بوز اوسته
کاباب يانار کؤز اوسته
قوي مني اؤلدورسونلر
دانيشديغيم سؤز اوسته (ه. ص. 160)

9-3 آراز آخار بوز اوسته
کاباب پيشر کؤز اوسته
قوي مني اؤلدورسونلر
دانيشديغيم سؤز اوسته (ن. ص. 10)


9-4 آراز اوسته بوز اوسته
کاباب يانار کؤز اوسته
قوي مني اؤلدورسونلر
دانيشديغيم سؤز اوسته (ن. ص. 11)

9-5 آراز اوسته بوز اوسته
کاباب يانار کؤز اوسته
قوي مني اؤلدورسونلر
بير آلا گؤز قيز اوسته (ه. ب. م. ص. 160)

9-6 آراز آخار بوز اوسته
کاباب پيشر کؤز اوسته
قوي مني اؤلدورسونلر
دانيشديغيم سؤز اوسته (ن. ص. 10)

10-1 آراز قيراغي مئشه
گتير دسمالين دؤشه
آراسينا گول قويوم
دؤوره‌سينه بنؤوشه (ف. ص. 236)

10-2 آراز قيراغي مئشه
گتير دسمالين دؤشه
آراسينا گول دوزوم
يانلارينا بنؤوشه (ه. ب. م. ص. 162)

11-1 آراز آخار قئيقاجي
بو گلن ايکي باجي
بيري منيم سئوگيليم
بيري اونون ديلماجي (ف. ص. 246)

11-2 آراز گلير قييقاجي
گتيرير بير جوت باجي
بيري منيم سئوگيليم
بيري باشيمين تاجي (ن. ص. 8)

11-3 آراز گلير قييقاجي
گتيرير بير جوت باجي
بيري منيم سئوگيليم
بيري باشيمين تاجي (ن. ص. 15)

11-4 آراز آخير قييقاجي
بو گلن ايکي باجي
بيري اؤز سئوگيليمدي
بيري اونون ديلماجي (ه. ب. م. ص. 190)

12-1 آراز بورولدو، گئتدي
سويي دورولدو گئتدي
من دئديم يار اينجيدي
دئمه يورولدو گئتدي (ف. ص. 251)

12-2 آراز بورولدو گئتدي
سويو دورولدو گئتدي
من دئديم يار اينجيدي
دئمه يورولدو گئتدي (ه. ب. م. ص. 172)

13-1 آراز باشدان آز اولدو
اؤردک دولو قاز اولدو
گوج ايلن بير يار تاپديم
او دا کلک باز اولدو (ف. ص. 266)

13-2 آراز باشدان آز اولدو
اؤردک ووردوم قاز اولدو
گوج ايلن بير يار تاپديم
او دا کلک باز اولدو (ه. ب. م. ص. 123)

14-1 آرازين قيراخلاري
دولو گلير آرخلاري
بير قيزيل گوله بنزر
سئوگيمين ياناخلاري (ف. ص. 285)

14-2 آرازين قيراخلاري
دولو گلير آرخلاري
شئه دوشموش گوله بنزر
ياريمين دوداقلاري (ه. ب. م. ص. 188)

15-1 آرازين کؤکونه باخ
اوروسون مشقينه باخ
درد اليندن اوخورام
گؤرن دئيير عشقينه باخ (ن. ص. 8)

15-2 آرازين دشتينه باخ
گؤزومون ياشينه باخ
درد اليندن اوخورام
دئييرلر عشقينه باخ (ن. ص. 9)

15-3 آرازين داشينا باخ
گؤزومون ياشينا باخ
درد اليندن اوخورام
دئييرلر عشقينه باخ (ن. ص. 15)

15-4 آرازدا داشقينا باخ
سويونون مشقينه باخ
درد اليندن اوخورام
دئييرلر عشقينه باخ (ه. ب. م. ص. 128)

16-1 آراز آراز، جان آراز
نه گئديرسن يان، آراز؟
سئوگيليم گميده‌دي
گل ائيله‌مه قان آراز (ه. ب. م. ص. 249)

16-2 آراز آراز، خان آراز
گل ائيله‌مه قان آراز
قوي گئديم، يار گؤزله‌يير
ندير بو طوغيان آراز (ه. ب. م. ص. 251)

16-3 آراز آراز، جان آراز
من سنه قوربان آراز
زامان مني يانديرير
سن ده آليش، يان آراز (ه. ب. م. ص. 58)

سونوچ

بهاالدين اؤگله گؤره تورک ميتولوژيسينده سو، حايات قايناغي اولدوغو ايچين قوتسالدير. بو قوتسالليق گؤزه، ايرماق، گؤل، دنيز ايچين ده گئچرليدير. بو يئرلرين ده قورويوجو روحلاري اولدوغونو اينانيلير.
سويون گوجلو اولماسي و يارانيشين سو ايله باشلانماسيني آلتاي تورکلرينين يارانيش حيکايه‌لرينده گؤروروک. وئربيت سئکييئن ين توپلاديغي يارانيش داستانيندا بئله يازيليب:« يئر گؤي هئچ بير شئي يوخ ايکن دونيا اوجسوز بوجاقسيز سولاردان عيبارتيدي. تانري «اولگن»
ülgən بو اوجسوز بوجاقسيز دونيادا دورمادان اوچوردو. گؤيلردن گلن بير سس، تانري اولگنه، دنيزدن چيخان داشين توتماسيني سؤيله‌دي. گؤيون امري ايله اوتوراجاق تاپان تانري اولگن، آرتيق «يارانما زاماني گلدي» دييه دوشونه‌رک بئله دئدي:
بير دونيا ايستيرم، بير سو ايله ياراديم
بو دونيا نئجه اولسون، نه بوي ايله ياراديم ....( سئکييئن:2009)

قوران-ي کريم کيتابيندا دا تانرينين نئچه يئرده سويا اؤنم وئرديگيني گؤره بيليريک. يونيس سوره‌سي 24-جو آيه، نازعات سوره‌سي 31-جي آيه بو اؤرنکلردن ساييلير. اؤزلليکله «انبيا» سوره‌سينين اوتوزونجو آيه‌سينده هر بير جانلينين سودان يارانماسيني گؤروروک. تانري قوران کريمده بئله يازيب:« مگر کافيرلر بيلميرلرکي: گؤيلر و يئر بيتيشيک ايدي، بيز اونلاري بير بيريندن آييرديق. و هر جانليني سودان ياراتديق؟ ... .»

گؤردويوموز باياتيلاردا آراز چايي اينسانلاردان بير نئچه قات يوخاري گؤرونور. آرازدان يارديم ديلگي، آرازا سيغينما، آرازا يالوار ياخار ائتمه باياتيلاردا گؤزه چارپير. اؤرنک:
آراز آراز، خان آراز
دريايا آخان آراز
سئوگيليم گميده‌دير
گل ائيله‌مه قان آراز! (ف. س. 115)

بو باياتيلاري ايچه‌ريک قونولارلا چئشيتلي داللارا آييرماق اولور. آنجاق اونلارا بورادا دئيينمک ايستميريک.
بورادا سويون اوستون بير دورومونو، گوجولو اولدوغونو آيدينلادير. بو چاي بير گوج اولاراق باياتيلاردا بليرله‌نير.
آراز چايي بورالارين کئچميشدن گونوموزه و گله‌جگه قالان تاريخي بلگه‌سي کيمي ياشاماقدادير. آراز ميلتيميزين آجيلاري، شنليکلري و ياشاديقلاري آنلارينين گرچک سيمگه‌سيدير.

قيسالمالار:
(ف. ص. 65): فرزانه، م.آ (2010)، آذربايجان خالق ادبيياتيندا باياتيلار، انديشه نو ياي، 7 باسيم، تهران.
(ه. ص. 77): حسنلو، حيدر (2010)، زنگان باياتيلاري، دانش زنجان ياي، زنگان.
(ن. ص.7): نيقابي، م (1979)، آذربايجان باياتيلاري، محمد ياي، تبريز.
(ه. ب. م. ص. 23): عبداله بهلول، بابا زاده قيزيل گول، محمدلي ائلخان ( 2010)، آذربايجان باياتيلاري، ( کؤچورن: اسدي بهرام) ياز ياي، اورمو.

قايناقلار
ائرجيلاسون،احمد بیجان (2008) « اوغوز بوي آدلارينين ائتيمولوژيسي» ديل آراشتيرمالاري درگيسي 3.گوز، آوراسيايازارلار بيرليگي ياي، آنکارا. س. 12.
عبداله بهلول، بابا زاده قيزيل گول، محمدلي ائلخان (2010)، آذربايجان باياتيلاري، ( کؤچورن: اسدي بهرام) ياز ياي، اورمو.
فرزانه، م.آ (2010)، آذربايجان خالق ادبيياتيندا باياتيلار، انديشه نو ياي، 7 باسيم، تهران.
حسنلو، حيدر (2010)، زنگان باياتيلاري، دانش زنجان ياي، زنگان.
ميرسلامت، سيد علي (2003) «باياتي اسکي تورک ميفولوژي باخيميندان» ائل ديلي و ادبياتي 5، تهران، ص. 67-69.
نيقابي، م (1979)، آذربايجان باياتيلاري، محمد ياي، تبريز.
قافقاسيالي، علي (2007)، ايران تورکلري و ميللي کيمليک، ارزروم.
سئکييئن، وئربيت (2009)، «آلتاي تورکلرينده يارانيش حيکايه‌سي» ( کؤچورن: زنگانلي آياز) بايرام درگيسي 22، گوز، زنگان، ص. 9.
(http://tr.wikipedia.org/wiki/Aras_Nehri)

  

  

  دوست و همکار گرامی

چنانکه از فعالیت های داوطلبانه کانون «انسان شناسی و فرهنگ» و مطالب منتشر شده در سایت آن بهره می برید و انتشار آزاد این اطلاعات و استمرار این فعالیت ها را مفید می دانید، لطفا در نظر داشته باشید که در کنار همکاری علمی، نیاز به کمک مالی همه همکاران و علاقمندان نیز وجود دارد. کمک های مالی شما حتی در مبالغ بسیار اندک، می توانند کمک موثری برای ما باشند.

 

حامی گرامی اطلاعات مالی کانون انسان‌شناسی و فرهنگ هفته‌ای یکبار در نرم افزار حسابداری درج می‌شود شما میتوانید شرح فعالیت مالی کانون را از طریق لینک زیر دنبال کنید.

 

https://www.hesabfa.com/View/Login

 

 

 

انسان شناسی تغذیه (1)
جنگ؛ میدان هویت‌سازی

Related Posts